الوالدين وحقوقهم وطريقة تعاملنا معهم

السلام عليكم ورحمة الله وبركاته

تذكر قول الله سبحانه وتعالى
(وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَاناً * إِمَّا يَبْلُغَنَّ عِنْدَكَ الْكِبَرَ
أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلاً كَرِيماً *
وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيراً)


اليوم حبيت اتكلم عن معاملة الوالدين وحقوقهم واحترامهم اللي للأسف هالايام ماعادت موجوده بسبب كلمة ( زمنكم غير زمنا )
شنو يعني زمنكم غير زمنا ؟؟؟ يعني الزمن تغير مثلاً ؟؟؟ يعني يوم السبت صار بدال يوم الثلاثاء ؟؟؟ ولا الساعه خمسة صارت بدال الساعة ثمانية ؟؟؟
ليش ما نقول الناس تغيرت بدال لا نقول الزمن تغير ؟؟؟ وشنو يعني لما نقول لأهالينا زمنكم غير زمنا؟؟؟ يعني هم عاشوا زمنهم وماتوا بزمنا؟؟؟
الحمد لله هذولا هم عايشين معانا بزمنا وعارفين كل شي يصير لا وعارفين احسن مننا لانهم عاشوا الماضي والحاضر ويقدرون يسون مقارنة بينهم ويعرفون شنو الغلط وشنو الصح
اما احنا ما نعرف عن الماضي الا القليل
راح اتكلم عن الشباب مع ابهاتهم و مع البنات مع امهاتهم لكن اكيد نقصد الولد والبنت سوا مع الاب ولا الام

نبدأ بالشباب

الحين الواحد من الشباب الله يهداه يعامل ابوه كأنه واحد غريب نلقاه يعلي صوته عليه و يصارخ ويشد معاه بالكلام ويقوله انتوا زمنكم غير زمنا ويمكن توصل لمدة الايد بعد واذا طلبه شي قاله جيب ماي
ولا روح الجمعية جيب الغرض الفلاني كأنه سابه يعصب الولد ويقول خل السايق خل اخوي اللي اصغر مني انا مو فاضي << موفاضي ركزوا الولد قاعد على النت ولا يتابع مباراة ولا مسلسل
و والله ثم والله ثم والله لو رفيجه او رفيجته تطلبه شي لو باخر الدنيا والله يقوم يفزلها بسرعه ويجيبها .
ولو نمسك تلفونه نلقاه مسمي ابوه ( الشايب ) او ( المباحث ) < الله يرحم ايام ( ابوي - الوالد - تاج راسي - الغالي )

واذا تكلم عن ابوه قدام ربعه تعالوا شوفوا التكسر والضغط
( والله شايبنا بط جبدي كله يتأمر ) ( يا اخي -هذا- ابوي معقد على باله للحين حنا بايام قبل )

يا أخي هذا ابوووووك تعرف منو ابووووك ؟

ابوك اللي تعب عشان يربيك
ابوك اللي يوم انولدت فرحته بالدنيا كلها
ابوك اللي الناس تناديه بأسمك مو بأسمه اذا بينادون يقولون ( يا ابوفلان ) ما يقولون فلان لانه يفتخر فيك ويعتبرك ظهره بهالدنيا
ابوك اللي لو يقولك غمض عينك وتغمض عينك لك فيها اجر عند رب العالمين
ابوك اللي مهما تسويله ومهما تقوله وتزعله ولو انك تطقه وتطيح بمصيبه تلقاه اول واحد يوقف معاك ويسوي المستحيل على شان يخلصك منها
ابوك اللي اذا قعد بمكان يفتخر فيك يقول ولدي فلان عمل وسوا وقال وجاب
ابوك اللي اذا زعلته وجيت بعد يويمن بس تبوس راسه على طول يرضى عليك ويقولك ( ياولدي انا ابي مصلحتك )

شنو تبون اكثر من جذي مو حرام اللي تسونه فيه؟؟؟

انا ولله الحمد بحياتي ما رفعت صوتي على ابوي ولا شديت معاه بالكلام
والله اذكر قبل اذا زعل او عصب علينا والله ما يطقنا كان يقولنا ( انتوا مافيكم خير ) اقسم بالله العظيم ان هالكلمه كانت تحطمنا ونقول لو انه ذابحنا ارحم
كلمه مع انه ما يقصدها لكن كانت مثل السيف بالصدر

ومره وانا مادري حطيت رجل على رجل وما انتبهت ان رجلي صارت بوجه اخوي وهو باخر الغرف
والله دش ابوي وشافني عطاني طراق اقسم بالله اكثر من عشر سنين للحين اتذكره
واشكر ابوي على هالطراق

-------------
والحين البنات مع امهاتهم

الحين اعوذ بالله البنت محد يقدر يكلمها ولا يقولها شي وخاصة امها وشنو السبب ؟ زمنكم غير زمنا
الام الحين لو تقول حق بنتها ( يابنيتي قومي شيلي اخوج وديه فراشه ) طبعاً البنت هني منسدحه على التلفزيون وترد عليها ( - يووووووووو - يما خليه شنو بيموت يعني )ولا ( - يوووووووه - يما بتابع المسلسل ولا الفلم )
( فَلا تَقُلْ لَهُمَا أُفٍّ وَلا تَنْهَرْهُمَا )

وتقوم الام مسكينه وتشيل الولد وهي مو قادره تشيل نفسها والبنت ولا تحركة فيها ذرة احساس
واذا قالت لها ( يابنيتي لاتسوين الشغله الفلانيه ) ترد البنت وبكل وقاحة ( شخباري الام تغصب بنتها وين عايشين اي زمن ) ؟؟؟ اي زمن انا اقولج اي زمن زمن عدم الاحترام .

واذا كانت البنت تبي شي من امها وامها تشوف ان هالشي ما يصلح لبنتها او مو وقته انها تملكه الحين نلقى البنت تقلب شيطان وتصارخ وتقول ( -يوووووووووه - انا مليت من هالعيشه كل شي مافي مافي - اووووف - زهقتونا )
( فَلا تَقُلْ لَهُمَا أُفٍّ وَلا تَنْهَرْهُمَا )

والام ساكته وتطالع بكل قهر بنتها اللي ربتها وكانت تعلق عليها امال كثيره
تشوفها تصارخ عليها و تشتمها وقلبها يتقطع ويعتصر بالحسره.

الأم اللي تحلم ان بنتها توقف معاها بالمطبخ تساعدها
الأم اللي تحلم ان بنتها تاخذ منها المخمه وتقول يما عنج انا انظف استريحي
الأم اللي تحلم ان بنتها تدش عليها بقلاص عصير ولا قهوة من غير لاتطلب

انتي يالبنت هذي امج اللي حملت فيج 9 شهور وهي بقمة الفرح مع انها تتألم وتتعب وماتنام
هذي امج اللي وانتي صغيره كنتي تصحينها من النوم وانتي تبجين وكانت تقوم من عز نومها تسويلج الحليب عشان تسكتين مو عشان تنام لا وربي عشان ماتشوفج تبجين

هذي امج اللي اذا مرضتي تلقينها فوق راسج ودمعتها بعينها تدعي ربها ان الله يشفيج وتقرا على راسج القرآن
هذي امج اللي تنتظر اليوم اللي تشوفج فيه عروس وتزفج وتفرح فيج قدام الناس كلها

جربي جيبيلها فجأة قلاص عصير ... جيبيلها هدية وانتي راده البيت وبوسي راسها
شوفي ابتسامتها شوفي عيونها شلون تغمرها العبره
وربي ان هاللحظه تسوى الدنيااااااااااااا باللي فيها
ويكفي يكفي يكفي ان الجنة تحت اقدام الامهات



انتوا على بالكم ان اهالينا اذا طلبناهم شي وقالوا لا .. يعني هذا بخل ؟؟؟
لا ورب العزه مو بخل هذا خووووف علينا
لان اهالينا لو نقولهم عطونا عيونكم وربي يعطونا من غير تردد وتفكير ومافي بالدنيا كلهااااااااااااااااااااااااااااااااااااااااااااااا ااااااااااااااااااااااااااااااااااا احد بيعطينا مثل ما عطونا

والله ثم والله ثم والله مو رجوله ولا شطاره ولا فخر ان الواحد يعاند اهله ولا يصارخ عليهم ولا يعاندهم

شوفوا اللي ابهاتهم او امهاتهم متوفين عسى الله يرحمهم ويغمد ارواحهم الجنه
وربي يتمنون الحنان اللي عندنا يتمنون عندهم اهل يعايدونهم يباركون لهم
وربي يحسدونا على اهالينا مو على فلوسنا ولا سياراتنا ولا لبسنا
والله لو تقولهم نعيشكم بخيمه ونرجع لكم لك اهاليكم يقولون راااااااااااااااااضي
لانهم ما لقوا بالدنيا باللي فيها اللي يعوضهم هالحنان وهالاهتمام

خافوا الله بأهاليكم وحطوا ببالكم يوم الحساب مو يوم باجر لما تقعد عند ربك ولا رفيجاتج ويقوولون امج وامج

تذكر قول الله سبحانه وتعالى :
(وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَاناً * إِمَّا يَبْلُغَنَّ عِنْدَكَ الْكِبَرَ
أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلاً كَرِيماً *
وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيراً)

والحديث الشريف
( جاء رجل إلى النبي صلى الله عليه وسلم يسأله: من أحق الناس بصحبتي؟ قال: أمك. قال: ثم من؟ قال: أمك. قال: ثم من؟ قال: أمك. قال: ثم من؟ قال: أبوك)


اختم كلامي هني عشان اخلي لكم المجال ونتناقش فيه

وسامحوني اذا غلطت او قلت شي غلط بس هذا واقع ولازم نواجهه وننصح

اخوكم
مجهول .!.