السلام عليكم ورحمة الله وبركاته
بصراحة حاب اني اتكلم عن اللي نشوفه بالمجمعات والاماكن العامة باللي يسمونه الشباب والبنات ( الموضة أو الحرية الشخصية )
أولا الموضه:
الحين عزكم الله طايحين بالشحاطات الفسفورية وصايرين يلبسونهم مع كل لبس
يعني جينز أزرق + بدي أبيض + ( شحاطة اصفر فسفوري) ما ادري شدخل الاصفر بين هاللونين ولما نشوفهم من بعيد تحس الشحاطة بروحها تمشي وكاسره العين
وين التناسق بالالوان وين الذوق باللبس صايرين اي شي يلبسونه ؟؟
والمصيبه اللي نشوفهم بعز البرد وعز الشتا لابس جاكيت وكاب ومدفي نفسه مسكين ونطالع تحت نلقاه لابس برمودا ولا شورت ؟؟؟! شنو مشتي فوق ومصيف من تحت ؟؟؟
ومن حلات السيقان مطلعهم معصقل وكله شعر واذا كان بطه سيقانه كل خطوه يهتز الشحم اللي فيها .
والبنات الله يهداهم صايرين بهالمجمعات بالبجامة ؟؟؟؟ شنو رايحة مخيم الله يهداج
ولا ما عندج ملابس تلبسينهم؟؟؟
والمصيبه الاعظم اذا بنتين مع بعض يتمشون نسمعهم وحده تقول للثانيه شفيج يا خـــ.....؟؟ بصوت عالي وقدام الناس ويضحكون لا حيا ولا هم يحزنون أصلاً ماكو انوثه
الشباب نفسهم يستحون يقولون هالكلام بمكان عام وبصوت عالي
والفئة الثانية من البنات ( نقاب تكفى لايطيح + عباية مخصصصصصصصصصره ) لو مفصخه اشرف
انتي رايحة مجمع يعني شباب وزحمة لابسه عباية مخصره راسمة كل تضاريس جسمج وشادتلي الصدر فوووووق يعني طالعوا ومكياج كأنج رايحة عرس ورقبتج تتكسر من الخز والمطالع يمين ويسار والمشية شوي شوي خطوة خطوة عشان شسمه ( انتوا تعرفون )
واذا احد تحرش فيج كليتيه اكل ( مسويه فيها محترمه ) وضحك واصل اخر المجمع ؟؟؟
شنو سبب هالشغلات؟؟؟
طبعاً بتقولون ( حرية شخصية )
للأسف الاعلام والصحف حطوا بروس بعض ( المساكين ) مفهوم غلط لمعنى الحرية الشخصية وما وصلوا المعنى الصحيح لها
لما سألت واحد وقلت له ليش تلبس جذي قال حرية شخصية .
سألته شنو يعني حرية شخصية . قال اني اسوي اللي ابيه من غير لا اتعدى على حدود غيري < لاحظوا ما ذكر شي عن الاسلام والعادات
قلت له طيب شنو يعني ما تتعدى على حدود غيرك؟؟
المسكين توهق ماعرف شنو يقول لانه اصلاً مايعرف شنو حرية شخصية
الحرية الشخصية اساساً تختلف من مجتمع لمجمتمع
مجتمعنا إسلامي وحرياتنا اصلاً اساسها الاسلام ومانتعداها
يعني لما يجي واحد لابس شورت فوق الركبه ويقول حرية شخصية وما تعديت على احد ؟ لا حبيبي تعديت
أولاً عورت الرجال من فوق الركبه وبجذي انت مطلع عورتك يعني خادش الحيا يعني تعدي على الناس
تجي تلبس تي شيرت عليه شعار اكبر شركة دعارة وتقول حرية شخصية؟
لا حبيبي انت جذي كسرت بأم الاسلام والناس اللي يطالعونك
أولاً انت تسوي دعاية حق هالشركة
ثانياً شنو موقفك و واحد من اهلك عارف هالشعار وشافك لابسه ؟؟
ثالثاً شنو ماكو لبس الا هذا ؟؟؟
وبعض الشباب الله يهداهم اذا بيضحكون يضحكون وبصوت عالي يعني شوفوا ترى نضحك هاااا ؟؟ وين احترام الموجودين بهالمكان ؟ يعني لما تضحك بصوت عالي يزعج الناس جذي انت حر وماتعديت على احد ؟؟؟
ومثلاً اذا طابور شباب عند الـ السحب الالي للبنك او كاشير وجتهم بنت او مره كبيره
مايخلونها تعدي ؟؟ مايخلونها تحاسب قبلهم ؟؟ يعني عاجبكم منظرها وهي تنتظركم ؟؟
وين الرجوله ؟ وين الشهامه ؟ وين على قولتكم السيدات اولاً ولا بس اذا كانت حلوه تخلونها قبلكم ؟؟؟؟
واذا على السلم المتحرك اذا اذا اذا خلوها تطوف قبلهم على طول لزقوا ورارها
يا اخي خل بينك وبينها ثلاث درجات اربع عشان تاخذ راحتها :@
انا اذا بتكلم ما راح اخلص بس اتمنى من الجميع انهم راجعون انفسهم بتصرفاتهم بالاماكن العامة
لان عيب اللي يصير حرام نخلي الناس اللي زايرين الكويت من برا يشوفونا بهالطريقة
وسامحوني على بعض الكلمات بس هذا الحق ولازم نحط حد للي يصير لان للأسف المصيبه كل مالها تكبر وتزيد
بأنتظار مشاركتكم
مجهول .!.
تعليقات
إرسال تعليق